राष्ट्रिय स्वतन्त्र पार्टी (रास्वपा) तनहुँको ब्यास नगर अधिवेशन जेठ १५ गते हुने भएको छ । अधिवेशन नजिकिँदै जाँदा ब्यास नगर सभापति पदका लागि वर्तमान सभापति चुडामणि दाहाल र उपसभापति सुशिल पौडेलबीच प्रतिस्पर्धाको चर्चा सुरु भएको छ ।
रास्वपा ब्यास नगरका उपसभापति रहेका पौडेलले सभापति पदमा उम्मेदवारी दिने तयारी गरेपछि चुनावी माहोल थप रोचक बनेको बताइएको छ । रास्वपाका तनहुँका एक नेताले हलचल खबरसँग कुरा गर्दै पौडेलको उम्मेदवारीले चुडामणि दाहाललाई पुनः सभापति बन्न सहज नहुने दाबी गर्नुभयो ।
उहाँका अनुसार यस पटक दाहालले नेतृत्व नयाँ पुस्तालाई हस्तान्तरण गर्दा उपयुक्त हुने र चुनाव भएको खण्डमा सुशिल पौडेल सभापतिमा निर्वाचित हुने सम्भावना बलियो रहेको बताए ।
हाल ब्यास नगर सभापतिको जिम्मेवारीमा रहेका चुडामणि दाहालले भने पुनः सभापतिमा निरन्तरता दिने इच्छा व्यक्त गर्नुभएको छ ।यता पार्टीभित्रका केही कार्यकर्ताले युवा नेतृत्व र सक्रिय भूमिकाका कारण अहिलेको अवस्थामा सुशिल पौडेल नै सभापतिका लागि उपयुक्त उम्मेदवार भएको प्रतिक्रिया दिएका छन् ।
