तनहुँ ।
मिति २०८२ साल कार्तिक १८ गते राति करिब बेलुकी ८:१५ बजे तनहुँ जिल्ला बन्दीपुर गाउँपालिका–५ बाहुन भञ्याङमा भएको झगडामा एक जनाको मृत्यु भएको छ। बाहुन भञ्याङमा बसोबास गर्ने ७० वर्षीय खिमबहादुर गुरुङ र ५८ वर्षीय खुसीमान गुरुङबीच मदिरा सेवन पश्चात झगडा हुँदा खिमबहादुरले खुसीमानलाई चिरपट प्रहार गरी घाइते बनाएका थिए।
घाइतेलाई उपचारका लागि बन्दीपुर अस्पताल लगिएकोमा टाउको र दाहिने खुट्टामा चोट लागेको र अवस्था मध्यम रहेको बताइएको थियो। प्राथमिक उपचारपछि थप उपचारका लागि राति ८ :५५ बजे मणिपाल अस्पताल पोखरा पठाइएको थियो।
तर मणिपाल अस्पतालमा CT-Scan मेशिन बिग्रिएको हुनाले उनलाई फिस्टेल अस्पताल पोखरा लगिएको थियो। त्यहाँ उपचारको क्रममा राति १०:५५ बजे चिकित्सकले मृत घोषणा गरेका थिए।
मृतकको शव हाल गण्डकी अस्पताल पोखराको शवगृहमा राखिएको छ। यस घटनामा संलग्न खिमबहादुर गुरुङलाई प्रहरीले नियन्त्रणमा लिएर थप अनुसन्धान अगाडि बढाएको प्रहरीले जनाएको छ।
