पोखरा — राष्ट्रिय स्वास्थ्यकर्मी महासंघ नेपाल, गण्डकी प्रदेश कमिटीले नेपाल नर्सिङ संघले सञ्चालन गरिरहेको आन्दोलनप्रति पूर्ण ऐक्यबद्धता जनाउँदै स्वास्थ्य मन्त्रालय, गण्डकी प्रदेशमा तीन बुँदे मागसहित ज्ञापनपत्र बुझाएको छ।
ज्ञापनपत्रमा निजी अस्पताल, नर्सिङ होम, स्वास्थ्य क्लिनिक, गैरसरकारी संस्था लगायत स्वास्थ्यसँग सम्बन्धित निकायमा कार्यरत स्वास्थ्यकर्मीलाई नेपाल सरकारले तोकेको दरअनुसार तलब–भत्ता प्रदान गर्न माग गरिएको छ।
त्यसैगरी सम्बन्धित रोजगारदाताले स्वास्थ्यकर्मीहरूलाई सामाजिक सुरक्षा कोषमा अनिवार्य रूपमा आबद्ध गराउनुपर्ने र कानुनविपरीत कुनै पनि सम्झौतामार्फत स्वास्थ्यकर्मीका पेशागत हकअधिकार कुण्ठित गर्न नदिने माग गरिएको छ।
महासंघले सरकारले यी मागहरूलाई गम्भीरताका साथ लिएर तत्काल नीति तथा कानुनी पहल थाल्ने विश्वास व्यक्त गरेको छ।
