लमजुङ
प्रेस चौतारी नेपालले आफ्ना केन्द्रीय अध्यक्ष गणेश पाण्डेको बेशीसहरस्थित घरमा गएराति ढुंगा प्रहार भएको घटनाप्रति घोर निन्दा जनाएको छ।
विज्ञप्ति अनुसार करिब राति १२ बजे गरिएको प्रहारबाट घरका झ्यालका सिसा फुटेका छन् र अध्यक्ष पाण्डेको ८२ वर्षीया हजुरआमा सुतेको कोठामा बढी क्षति पुगेको छ। सो घरमा अध्यक्षकी आमा र हजुरआमा बस्दै आएका छन्।
संस्थाले यो आक्रमण योजनाबद्ध रहेको दाबी गर्दै, “भदौ २४ गतेदेखि सामाजिक सञ्जालमा अध्यक्ष पाण्डेविरुद्ध उत्तेजनात्मक टिप्पणी र घरमा आक्रमणको आह्वान भएको” उल्लेख गरेको छ।
प्रेस चौतारीले अपराधमा संलग्न व्यक्तिहरूलाई तत्काल कानूनी कारबाहीमा ल्याउन माग गर्दै घटनाको छिटो, निष्पक्ष र प्रभावकारी अनुसन्धान गर्न सुरक्षा निकायलाई आग्रह गरेको छ।
