तनहुँ — व्यास नगरपालिका–२, दमौलीस्थित पिजनहील स्कूल अफ हस्पिटालिटीले सोमबारदेखि आफ्नो औपचारिक सेवा शुभारम्भ गरेको छ। कार्यक्रमका प्रमुख अतिथि व्यास नगर प्रमुख वैकुण्ठ न्यौपानेले पानसमा दीप प्रज्वलन गरी सेवाको औपचारिक शुभारम्भ गर्नुभयो।
कार्यक्रममा बोल्दै नगर प्रमुख न्यौपानेले हस्पिटालिटी शिक्षाले युवालाई रोजगारमूलक सीप प्रदान गर्ने भएकाले यस्तो संस्थाको सञ्चालनले स्थानीय तहमा रोजगारी र व्यावसायिक दक्षता अभिवृद्धिमा टेवा पुर्याउने विश्वास व्यक्त गर्नुभयो।
कार्यक्रमको अध्यक्षता विद्यालयका सञ्चालक विवेक सापकोटाका पिता तुलसिराम सापकोटाले गर्नुभएको थियो।विशिष्ट अतिथिमा भानु नगरपालिकाका प्रमुख आनन्द त्रिपाठी रहनुभएको थियो। कार्यक्रममा नेकपा (एमाले) तनहुँका जिल्ला अध्यक्ष हरिराज कडेल, व्यास नगरपालिका–२ का वडा अध्यक्ष काशीराम श्रेष्ठ, वडा नं ३ का अनुप राना, वडा नं ४ का मनबहादुर गुरुङ, वडा नं ५ का विष्णु कुमार श्रेष्ठ (हिमाल) र वडा नं १० का खेमराज पोखरेल, उद्योग वाणिज्य संघ तनहुँका अध्यक्ष वैकुण्ठ मिश्र, होटल व्यवसायी प्रेमकुमार श्रेष्ठ, दुर्गा विलास भट्टराईलगायत विभिन्न संघसंस्थाका अध्यक्ष तथा प्रतिनिधिहरूको उपस्थिति रहेको थियो। शुभारम्भ कार्यक्रममा स्थानीय सरोकारवाला व्यक्तिहरूको समेत सक्रिय सहभागिता थियो।
