तनहुँ । अखिल नेपाल किसान महासंघ तनहुँका अध्यक्ष गोविन्द मिश्र र भूमि अधिकार तथा श्रमिक संगठन तनहुँका अध्यक्ष प्रेमबहादुर हमालले संयुक्त रूपमा जिल्ला प्रशासन कार्यालय तनहुँका प्रमुख रामकृष्ण अधिकारीलाई ज्ञापनपत्र बुझाएका छन् ।
२०७९ असोज २३ गते गठित भूमिसम्बन्धी समस्या समाधान आयोगले भूमिहीन, सुकुम्बासी र मजदुर जनताको समस्या समाधानका लागि काम सुरु गरेको भए पनि आयोग खारेज भएपछि त्यसको कार्य रोकिएको भन्दै दुवै संगठनले पुनः आयोग गठन गर्न माग गरेका छन् ।
ज्ञापनपत्रमा भूमिहीन, सुकुम्बासी, अव्यवस्थित बसोबासी र भूमिहीन दलित मजदुर वर्गको बासस्थान, पहिचान र जीवननिर्वाह अधिकार सुनिश्चित गर्न सरकारको ध्यानाकर्षण गराइएको छ । राज्यका योजना, नीति र कार्यक्रमहरूले अझै समुदायको वास्तविक समस्या समाधान गर्न नसकेको उल्लेख गर्दै संगठनहरूले तत्काल ठोस कदम चाल्न आग्रह गरेका छन् ।
ज्ञापनपत्रमा २३ लाख बढीको लगत संकलन गरी समस्या समाधानको प्रयास गरिएको भए पनि प्रभावकारी प्रगति हुन नसकेको जनाइएको छ । साथै, भूमिहीन, दलित र सुकुम्बासीको पहिचान तथा दर्ता कार्य शीघ्र गर्न, पुनर्स्थापनाको प्रक्रिया न्यायसंगत र छिटो सम्पन्न गर्न, र बासस्थान तथा जग्गासम्बन्धी निर्णय स्थानीय तहमै गर्नुपर्ने माग गरिएको छ ।
आयोगले काम प्रभावकारी रूपमा गर्न नसकेको तथा सुकुम्बासी समस्यामा जनप्रतिनिधि र नागरिकको प्रत्यक्ष सहभागिता नसमेटिएको गुनासो पनि गरिएको छ ।
समस्याको शीघ्र समाधान नभए आन्दोलनका कार्यक्रम निरन्तर अघि बढाइने चेतावनी पनि संगठनहरूले दिएका छन् ।
ज्ञापनपत्र बुझाउने कार्यक्रममा अखिल नेपाल किसान महासंघ र भूमि अधिकार तथा श्रमिक संगठन तनहुँका पदाधिकारी र सदस्यहरूको उपस्थिती रहेको थियो ।
